Përparim Seati, i cili u qëllua me thikë më herët gjatë ditës, ka humbur jetën në spital.
Ngjarja ndodhur rreth mesditës në një fshat në Patos, ndërsa autori i dyshuar, 31-vjeçari Alionid Sali, u arrestua disa orë më vonë.
Ngjarja
Rreth orës 12:20, në Spitalin Rajonal Fier ka shkuar i plagosur me thikë 46-vjeçari, banues në fshatin Kasnicë, njoftoi policia.
Pas marrjes së njoftimit, u ngrit grupi hetimor i cili zbardhi ngjarjen duke arrestuar në flagrancë autorin e dyshuar, shtetasin Alionid Sali, 31 vjeç, banues në të njëjtin fshat.
Ky i fundit, për motive të dobëta, ka qëlluar me thikë Seatin në fshatin Kasnicë.
Më pas, 31-vjeçari u largua nga vendngjarja me mjetin e tij tip “Benz”, por disa orë më pas, u bë e mundur kapja dhe arrestimi në fshatin Drizarë, Mallakastër.
Ndaj tij, u ngrit akuza për veprën penale “Vrasje me dashje e mbetur në tentativë”, por pritet të riklasifikohet në “vrasje”.
Ndërkohë, i plagosuri u transportua në spitalin Rajonal të Fierit, por disa orë më pas, ndërroi jetë.
