Kukësi është i interesuar për shërbimet e sulmuesit të Shqipërisë, Azdren Llullakut. Nuk bëhet fjalë vetëm për një dëshirë, por më shumë se kaq.
Ashtu siç raporton “Panorama Sport” klubi verilindor e ka kontaktuar tashmë futbollistin dhe ia ka bërë të qartë se e ka në plane, e megjithatë pengesë mbetet kontrata e lojtarit. Ai është i lidhur edhe për 6 muaj me Shakhtyor Soligorsk.
Vetë sulmuesi ka nisur negociatat me bjellorusët që të prishë marrëveshjen në mënyrë konsensuale, por mbetet për t’u parë nëse do t’i miratohet apo jo kjo kërkesë. Gjasat janë që edhe mund t’i bindë drejtuesit e klubit ku militon, por jo gjithçka është në dorën e sulmuesit.
Ky vit po mbyllet pa asnjë trofe për verilindorët, megjithatë për sezonin e ri drejtuesit kanë filluar planet e mëdha që tani. Me Vasil Shkurtajn që do të largohet në mbyllje të këtij kampionati dhe Kristal Abazajn që i mbaron huazimi, sulmi do të “varfërohet” ndjeshëm dhe afrimi i 32-vjeçarit do të ishte një siguri për klubin.
