I kushton shtrenjtë Graziano Pelle gjesti i shëmtuar në drejtim të trajnerit Ventura kur trajneri e zëvendësoi në ndeshjen me Spanjën.
Qendërsulmuesi është përjashtuar nga Kombëtarja për ndeshjen e së dielës me Maqedoninë.
Lajmi i bë i ditur nëpërmjet një komunikate nga Federata Italiane në të cilën shkruhet: ”Trajneri Gian Piero Ventura, në dakordësi me Federatën Italiane të Futbollit, vendosi të përjashtojë futbollistin Graziano Pelle nga lista e të grumbulluarve për ndeshjen me Maqedoninë në program të dielën e 9 Tetorit në Shkup, për mungesën e respektit që tregoi gjatë zëvendësimit në takimin ndaj Spanjës”.
Federata Italiane shton se një sjellje e tillë është kundër vlerave që duhet të përfaqësojë fanella e Kombëtares, ndaj dhe lojtari rikthehet menjëherë në dispozicion të klubit.
Gjatë natës vetë Pelle kishte kërkuar falje nëpërmjet rrjeteve sociale duke e pranuar se kishte bërë një gabim dhe sjellja e tij është e papranueshme si në drejtim të trajnerit ashtu dhe ndaj grupit.
