Mazhoranca e drejtuar nga Edi Rama është tërhequr nga nisma për shkarkimin e Ilir Metës nga posti i Presidentit të Republikës, edhe pse me pompozitet Komisioni Hetimor i drejtuar nga Ulsi Manja, shprehej i vendosur prej disa muajsh për të nxjerrë jashtë zyrës Presidenciale, Metën.
Ditën e sotme është pohuar se shkeljet e evidentuara nuk janë të mjaftueshme për shkarkimin e Metës nga posti presidencial, çka do të thotë se Edi Rama ka humbur një tjetër betejë përballë Ilir Metës.
Relatorja Klotilda Bushka tha se dokumentet që ka administruar komisioni jane mbi 50 akte me praktika të plota, ndërsa raporti i hartuar mbrëmjen e djeshme, pritet ti jepet deputetëve të hënën.
“Analiza e të gjitha provave që janë administruar i është nënshtruar edhe metodës së interpretimit të natyrës së shkeljeve dhe është vlerësuar nga gjithë procesi që është kryer, që të analizohet shkelja e rëndë; nga dy faktorë, nga rrethanat që kanë ndikuar dhe pasojat që kanë ardhur nga kryerja e shkeljes.
Kam menduar që ne nuk mund të marrim në konsideratë disa që janë ekskluzivitet i Gjykatës Kushtetuese, si rasti nëse konsiderohet e cënuar e drejta e një gjyqtari kur Presidenti nuk kryen betimin, se janë kompetenca që i takojnë Gjykatës Kushtetuese.
Nisur nga provat dhe natyra e komisionit hetimor që është teknik dhe jo i natyres politike, jemi fokusuar në çështje që kanë të bëjmë me ato që pretendohen në kërkesën e deputetëve për shkarkimin dhe nëse janë apo jo shkeklje dhe nëse shkeljet janë të rënda.
Nga analiza e provave rezultuan disa shkelje nga ana e Presidentit te Republikes si në kuadër të ushtrimit të kompetencave për shkeljet, por edhe emërimet në Kushtetuese, që analizohen në raport.
Këto shkelje referuar rrethanave dhe pasojave dhe fakti që komisioni nuk mund të shprehet se janë ekskluzivitet i gjykatave, janë shkelje që kanë natyrë që diktojnë marrjen e masave të menjëhershme për plotësimin e aktit kushtetueses për evitimin e situatave bllokuese, por nuk janë të mjaftueshme për të justifikuar shkarkimin e Presidentit”, thuhet ndër të tjera në raportin e Komisionit Hetimor me relatore deputeten Bushka.
Duke evidentuar disa nga shkeljet e Presidentit, Bushka thekson se kemi një shkelje për shfuqizimin e dekretit. “U cënua e drejta për të zgjedhur. Kryerja e veprimeve për anulimin apo shtyrjen e zgjedhjeve cenuan edhe parimin e së drejtës së popullit për të qenë sovran dhe për të ushtruar të drejtat e tij.
Sa i përket pasojave, ne arrijmë në konkluzionin që ka pasur shkelje në lidhje me anulimin e datës së zgjedhjeve, por për të analizuar cfarë pasojash sollën është marrë në konsideratë praktika që kemi administruar edhe nga policia edhe nga prokuroria”, thotë ajo.
