Cristiano Ronaldo vazhdon të ketë një impakt të madh në futbollin botëror edhe në moshën 35-vjeçare. Anësori portugez duke u bazuar te shifrat po kalon vitin e tij më të mirë që nga sezoni 2015/16 të paktën vetëm për sa i përket kampionatit.
Deri më tani në vitin 2020, vetëm Robert Lewandowski (21) ka shënuar më shumë se Ronaldo (20), me superyllin portugez që filloi vitin duke shënuar në 11 ndeshje radhazi në Serisë A, rekord ky që e ndan me Gabriel Batistutën dhe Fabio Quagliarellan.
Ndërkohë pas rifillimit të sezonit të ndërprerë nga pandemia, Ronaldo ka shënuar shtatë herë për Juventusin në tetë ndeshje dhe tashmë është vetëm një gol prapa Ciro Immobile si golashënuesi më i mirë në Serie A.
Fenomeni i futbollit botëror është gjithashtu në garë për këpucën e tij të pestë evropiane, ku listën e kryeson Robert Lewandowski me 34 gola.
Ronaldo mbërriti vetëm në Torino në vitin 2018, por 60 golat e tij në 83 ndeshje tashmë e kanë futur atë në 25-en e golashënuesve më të mirë të të gjitha kohërave të Juventus.
Në tre sezonet e fundit ai ka shënuar 25 (2016/17), 26 (2017/18) dhe 21 (2018/19) gola në kampionat, ndërsa këtë sezon është në shifrën e 28 golave.
Me Scudetton praktikisht të siguruar, Ronaldo do të tentojë të thyejë të tjera rekorde për të përforcuar akoma më shumë legjendën e tij në historinë e sportit.
