Trajneri i Interit, Antonio Conte, ka deklaruar se nuk do të “hezitojë” të largohet nëse klubi është i pakënaqur me rezultatet që ka arritur.
Conte u bashkua me Interin në fillimin e sezonit, por ka pasur zëra që ish- tekniku i Chelsea dhe Juventus mund të largohej në fund të sezonit aktual. Dyshimet për një largim të Contes janë shfaqur pas rezultateve zhgënjyese të Interit në pjesën e dytë të sezonit dhe frustrimit të Contes me drejtuesit dhe shpesh me lojtarët.
“Më thirrën te Interi për një projekt tre vjeçar, për t’i rikthyer atje ku ata meritojnë të jenë,” tha Conte për Sky Sport Italia. “Në mënyrë të pashmangshme, kjo kërkon kohë. Unë erdha këtu me aq shumë entuziazëm. Kam besim.”
“Nëse të gjithë janë të kënaqur me punën që jam duke bërë, dhe unë mendoj se është kështu tani, nga ato që më janë thënë, atëherë nuk shoh pse nuk duhet të vazhdojmë më tej.”
“Nëse për një moment kuptoj që ata nuk janë të kënaqur me punën që unë po bëj, atëherë nuk do të hezitoj të largohem.” – ka thënë Antonio Conte.
