Ngjarja e zbuluar pasditen e së enjtes në Kombinat i ngjan një skene horror. Disa orë pas ngjarjes ku në një banesë u zbuluan trupat e pajetë të nënës dhe vajzës, ndërsa vajza tjetër u transportua në gjendje të rënduar drejt QSUT, ende nuk ka një informacion zyrtar se kur nënë e bijë kanë humbur jetën.
Zhaneta, Anisa dhe Blerta Josifi, ishin besimtare të Jehovait dhe mendohet se ato janë vetëflijuar. Fatmirësisht Blerta është mundur të shpëtohet dhe pas trajtimit mjekësor është transportuar drejt Psikiatrisë.
Nëna dhe vajzat kishin shmangur kontaktet me banorët e tjerë të pallatit, ndërsa ka qenë era e rëndë që shpërndahej në pallat për shkak të dekompozimit të trupit të Anisa Josifit, gjë e cila ka alarmuar banorët.
Dyshohet se vajza kishte ndërruar jetë prej muajsh , ndërsa nëna dhe motra tjetër i lyenin trupin me vaj ulliri dhe uthull për të ngadalësuar procesin e dekompozimit duke pritur kështu ringjalljen e saj.
Ekspertët kanë konstatuar paraprakisht shenja mumifikimi në trup për shkak të vajit të ullirit dhe uthullës, ndërsa fillimisht ajo ishte mbështjellë me çarçafë.
Gjithashtu, ato e kishin mbuluar trupin e Anisës me shumë jorganë dhe batanije me qëllim që të mos shpërndahej era e rëndë e dekompozimit.
Gratë thuajse nuk kishin kontakt me askënd në pallat duke qëndruar brenda në shtëpi, gjë e cila ka shqetësuar vëllain e Zhanetës, i cili kishte tentuar të kontaktonte në mënyrë të vazhdueshme.
Ndërkohë, kunati i Zhaneta Josifit deklaron për abcnews.al se kishte shkuar dy muaj më parë tek shtëpia e saj duke pyetur për vajzën, por ajo i kishte thënë se nuk e lenë të dalë jashtë sepse nuk kishte përmbushur “ditët e Zotit”.
Më herët, në shtëpinë e Zhaneta Josifit kishte shkuar edhe policia për ta pyetur nëse kishin ndonjë problem se përse nuk dilnin jashtë, por kanë marrë prej tyre deklarimin se po ruheshin nga koronavirusi.
Ishtë vëllai i Zhaneta Josifit që alarmoi policinë pasi e motra nuk i përgjigjej prej disa ditësh në telefon. Pas ndërhyrjes së policisë në shtëpi janë gjetur Zhaneta Josifi dhe Anisa Josifi të vdekura, kurse Blerta Josifi në gjendje të rëndë shëndetësore.
