33-vjeçari Miklovan Parubi, autori i dyshuar i vrasjes së dyfishtë në Dajç të Shkodrës kishte pasur një konflikt me një prej të plagosurve, konkretisht Ndok Marku, 35 vjeç, i cili ka qenë edhe shënjestra e tij.
Pas konfliktit në lokal, Parubi është larguar dhe është rikthyer me një automatik. Ai ka bërtitur “Do ju vras të gjithëve”, por 42-vjeçari Arjet Saiti, pronar i lokalit ka tentuar t’i marrë armën. Megjithatë 33-vjeçari ka qëlluar me breshëri automatiku duke vrarë Saitin dhe Gacalin Kopshtin.
Policia e Shkodrës ka vënë në dispozicion edhe një shpërblim prej 500.000 lekësh të reja për çdo informacion për vendndodhjen e autorit.
“Drejtoria Vendore e Policisë Shkodër njofton se ofron një shpërblim prej 500.000 lekë, për çdo informacion që çon në saktësimin e vendndodhjes së autorit të ngjarjes duke siguruar anonimatin. Për çdo të dhënë mund të kontaktoni në çdo kohë në numrat e telefonit 069 41 01 985 dhe 069 41 02 060, por dhe në numrin 129”, njofton Policia.
Sipas saj, kërkimet janë shtrirë në zonën e Nënshkodrës me qëllim kapjen dhe vënien para drejtësisë së autorit të ngjarjes.
