Jo një por plot 4 kallëzime po hetohen nga Prokuroria e Tiranës për kreun e bashkisë Erion Veliaj. Megjithatë kjo nuk e ka penguar Veliajn t’i shkojë në dasmë kreut të këtij institucioni, Petrit Fusha, i cili kurorëzoi mbrëmë në martesë djalin e tij.
Ceremonia u zhvillua në një lokal luksoz në Vorë. Mes të ftuarve ishin të gjithë shefat e prokurorisë, përfshirë edhe kryeprokurorin Adriatik Llalla.
Ndërsa kreu i bashkisë kishte një vend të veçantë, pasi bëri celebrimin e çiftit në lokal.
Nuk e dimë nëse prezenca e tij aty është vetëm çështje zyrtare, (celebrimi) apo së fundmi ka ndonjë miqësi mes kryebashkiakut dhe kreut të Prokurorisë në Tiranë, Petrit Fusha.
Por dimë që Veliaj po hetohet për 4 denoncime: për falsifikim të gjobës që i vuri Partisë Demokratike për protestën e 8 dhjetorit. Hetimet kanë provuar se shkrimi në gjobë nuk është i oficerit që kishte firmosur gjobën.
Veliaj po hetohet edhe për ndërtimin te Parku i Liqenit. Ai është paditur penalisht për shpërdorim detyre.
Një tjetër kallëzim ndaj tij është bërë për protestën e zhvilluar para Gjykatës Administrative. Veliaj dërgoi para dyerve të gjykatës militantë e punonjës të bashkisë për të t’i kërkuar gjykatës që të mos lejonte ndërtimet e një kompleksi pallatesh pranë digës së liqenit Artificial.
Ai po hetohet edhe për rastin e vdekjes së 17 –vjeçarit Ardit Gjoklaj në landfillin e Sharrës, që administrohet nga Bashkia dhe për marrëveshjet me kompaninë 3R që operonte në këtë landfill, me punonjës minorenë e të pasiguruar.
