Interi vazhdon projektin e saj për ndërtimin e një skuadre të madhe që pas ardhjes së Antonio Conte në stol. Vitin e kaluar zikaltërit arritën të konkretizojnë disa marrëveshje të bujshme ndërsa e njëjta gjë duket se po ndodh edhe këtë vit.
Për të përforcuar skuadrën për sezonin e ardhshëm dhe Achraf Hakimi është emri i parë që do t’i bashkohet organikës së Contes, me mediat ndërkombëtare që e bëjnë transferimin e tij në Milano çështje orësh.
E ndërkohë që firma me mbrojtësin maroken është në rrugën e duhur, drejtuesit zikaltër kanë hedhur sytë nga mesfushori Sandro Tonali, i cili cilësohet nga mediat italiane si “Pirlo i ri”.
Momentalisht Brescia pretendon 50 milionë euro për kartonin e tij, ndërsa zikaltrit janë gati të ofrojnë 30-35 milionë euro, për të marrë në Milano një nga mesfushorët më të talentuar italianë, që vlerësohet shumë edhe nga Conte.
Paralelisht me merkaton në hyrje, drejtuesit zikaltër vijojnë punën edhe për atë në dalje, pasi shpresojnë që këtë verë të shesin emra si Perisic e Joao Mario, që do të sillnin para të mjaftueshme për të financuar blerje të reja.
