Lazio ka fituar me përmbysje ndaj Fiorentinës me rezultatin 2-1. Ribery shënoi i pari për miqtë, ndërsa për lacialët, shënuan Immobile dhe Luis Alberto duke mundësuar kështu përmbysjen e madhe.
Për tu përmendur është fakti se Ribery shënoi një supergol në pjesën e parë, duke dribluar tre futbollistë dhe duke shënuar në shtyllën e parë. Por në pjesën e dytë, Lazio u fut në fushë me ide të qarta.
Immobile barazoi me penallti në minutën e 67-të, ndërsa në të 83-ën, Luis Alberto përmbysi gjithçka. Fiorentina e mbylli dhe me 10 futbollistë, pas daljes me të kuq të Vlahovic në sekondat e fundit.
Me këtë fitore, Lazio e shkurton diferencën me Juventusin përsëri në katër pikë, ndërsa Fiorentina renditet në vendin e 13-të me 31 pikë të grumbulluara.
