Analisti i A2, Afrim Krasniqi, komentoi publikimin e aktakuzave të ngritura nga Prokuroria Speciale ndaj Presidentit të Kosovës, Hashim Thaçi dhe kryetarit të Partisë Demokratike të Kosovës, Kadri Veseli, ku ata akuzohen për një sërë krimesh kundër njerëzimit dhe krimesh lufte.
Krasniqi thekson se ngjarja ka lidhje me pritshmëritë që kishte takimi i Uashingtonit më 27 qershor, mes Kosovës dhe Serbisë.
“Ngjarja ka lidhje me bisedimet dhe ka lidhje me pritshmëritë që kishte takimi i Uashingtonit dhe ndoshta duhet të presim edhe pak kohë për të parë nëse ka pasur edhe faktorë të tjerë të përfshirë për shkak të kritikave që kanë ardhur nga BE-ja në raport me nismën e marrë nga Uashingtoni. Por, në praktikën ndërkombëtare, gjykata të tilla, pavarësisht se janë profesionale, nisen nga individë të pavarur, në thelb vendimmarrja e tyre është mes pavarësisë profesionale dhe qëllimeve politike. Në këtë lloj këndvështrimi, akti i sotëm është më shumë politik, pasi është një akt i publikuar përpara se të marrë një vendim gjykata. Vetë fakti që nisma për të penguar procesin është një argument politik dhe jo ligjor. Ajo që ndodh sot në Kosovë është një goditje e madhe ndaj imazhit të saj ndërkombëtar, në bisedimet në Uashington dhe hap një spirale të re të një krize politike, e cila mund të ketë pasojë jo vetëm në Kosovë, por edhe në rajon”, u shpreh Krasniqi.
Më tej, Krasniqi shprehet se Thaçi duket se ka pasur informacione për një zhvillim të tillë. “Nëse shohim deklaratat e Thaçit se ai mezi pret të largohet nga politika dhe do të largohet vitin e ardhshëm, duke se ka pasur informata për një zhvillim të tillë. Edhe reagimi i sotëm që ka ndodhur në Prishtinë dhe në Tiranë lidhet me individin dhe thuhet se UÇK-ja që UÇK-ja nuk është e fajshme dhe individi është i pafajshëm. Por këtu nuk është çështja nëse individi është i fajshëm apo i pafajshëm, por këtu është çështja e përfaqësimit të Kosovës dhe këtu impakti do të jetë shumë i madh. Në këto rrethana do të duhet të veprojnë dy faktorë. Së pari, faktorët institucional, për të sqaruar edhe në kanalet diplomatike se çfarë po ndodh me dialogun dhe çfarë po ndodh me Kosovën, nëse ka një projekt pas saj dhe kjo është pjesë e këtij projekti. Ky do të ishte një lajm i keq për Kosovën dhe për të gjithë ne. Së dyti, është përgjegjësia personale”.
Por a do ta japë dorëheqjen në këtë situatë Thaçi? “Varet se si do të shkojë procesi i gjykimit dhe nëse gjykata do t’i marrë në konsideratë akuzat e prokurorit, por është e pritshme që kryetari i shtetit kur akuzohet të mos jetë njëherësh kryetar shteti. Për mua e rëndësishme është se kush e përfaqëson sot Kosovën, pasi koalicioni është i dobët. Për shkak të dobësisë së qeverisë, Kosova ngelet në një nivel shumë më të ulët se pala serbe dhe kam frikë se nuk do të arrijë dot të përfaqësohet si duhet”.
Çfarë produkti mund të sjellë takimi i Uashingtonit? Unë personalisht pres që të mos ketë marrëveshje të rëndësishme pas zhvillimit të sotëm. Në kushtet që ndodhet Kosova, Hoti do të duhej të krijonte një koalicion të vullnetit të mirë, në mungesë të presidentit dhe të ish-kryetarit të parlamentit. Kosova do të duhet të bëjë maksimalen për të pasur një përfaqësim sa më solid. Frika sot në Kosovë nuk është se individi do të shkojë në burg, por çfarë pasojash do të ketë në raport me Serbinë dhe në raport me ndërkombëtarët”./A2News.com
