Nëse do ta shikonim nga larg panoramën që të shfaq politika shqiptare të krijohet përshtypja se çdo veprim i saj bëhet për hatër të integrimit të Shqipërisë në Bashkimin Evropian.
Aq e dukshme është kjo saqë për çdo lajm që na vjen nga Evropa, kritik apo lavdërues, palët do të kenë gjithnjë dy qëndrime të kundërta, duke akuzuar palën tjetër se ajo po e pengon integrimin. Por, në disa raste edhe vetë evropianët e zyrave, ose më saktë ata që na vlerësojnë punët tona dhe që në fund japin edhe notën sa mirë është bërë një punë, kanë filluar të jenë më konkretë. Nëse deri para disa kohësh Evropa kishte një refren të përgjithshëm duke thënë se Shqipëria duhet të luftojë krimin e organizuar, korrupsionin dhe të ngrejë shtetin ligjor, sot është edhe më konkrete në detaje. Pikërisht një seancë e komisionit për marrëdhëniet me jashtë në Parlamentin Evropian, një ditë më parë, ishte po aq konkrete sa edhe ne që i dimë hallet tona. Për të komentuar kritikat e eurodeputetëve, ishte i ftuar në A2 anëtari i Këshillit Kombëtar të Partisë Demokratike, Genc Pollo.
“Ndjehemi keq kur na kritikojnë, por duhet të themi që 15 kushtet e debatuara në Bruksel janë 15 probleme të krijuara në Shqipëri që duhet të kapërcehen. Së pari, për një funksionim të mirë të shtetit ligjor dhe së dyti, për një objektiv strategjik. Në fund të fundit, nuk duhet të jemi negativë, pavarësisht jo të këndshme, por duke qenë se jemi vetë përgjegjës, edhe pse jo të gjithë njësoj, unë e shikoj këtë si një ndihmë dashamirëse që vjen nga miqtë tanë për të kaluar këto 15 probleme”, u shpreh Pollo.
Më tej, Pollo thekson se mohimi i kushteve nga kryeministri është problem më i madh se kushtet. “Në nivelin e kreut të qeverisë, ne kemi mohimin e 15 kushteve. Kjo është një çështje, ndoshta për psikologë, që një gjë kaq e dukshme mohohet nga ai që ka përgjegjësinë për t’u zgjidhur. Ajo që vijon përbën edhe shqetësimin tjetër që është më i madh, derisa nuk i pranon nuk do të bëjë asgjë. Atëherë nuk do të kemi as çelje të negociatave”, u shpreh Pollo.
