Presidenti i Republikës, Bujar Nishani dekoroi diplomatin e parë amerikan që ka shërbyer në Tiranë pas rivendosjes së marrëdhënieve diplomatike me SHBA.
Christopher Hill u dekorua në 25-vjetorin e rihapjes së Ambasadës në Tiranë.
“Puna e palodhur dhe veprimtaria e pareshtur, kontributet e mëdha të një miku shqiptar për të thelluar bashkëpunimin, ndjenjën e afërsisë, ofrimin dhe dhënien e ndihmës pa rezerva kanë karakterizuar misionin diplomatik të ambasadorit Hill në vendin tonë. Askush më mirë se ai nuk ka ditur në fillim të viteve ‘90 e më pas të na gjendet në krah këtu në Tiranë, duke punuar si fillim në Hotel Dajti e më pas në selinë e rihapur”, thuhet në motivacionin e dekorimit.
Edhe pse Hill ka shërbyer pak muaj në Tiranë, kontributi në rivendosjen e marrëdhënieve diplomatike vlerësohet sot nga shteti shqiptar me dekoratën “Gjergj Kastrioti Skënderbeu”.
“25 vjet janë shumë në jetën e një individi por edhe të një shteti, por fakti që u kujtuat për mua pas këtyre viteve më nderuat. Kur kujtoj 1991 ne ishim miq edhe atëherë, por të ndarë nga vite nga një histori e trazuar. Më pas realizuam se asnjëri s’është perfekt as Shqipëria as SHBA, por i tejkaluam edhe ato. Kur shoh sot një ambasadë të suksesshme këtu ndjehem mire që marrëdhëniet tona kanë arritur deri këtu. Miqësia jonë mbetet e veçantë edhe sot. Sot shoh shumë progres, por s’ka mbaruar ende. Këtë medalje që mora sot do ta mbaj pranë zemrës, një simbol i punës që ne bëmë më 1991-n”, tha nga ana e tij ambasadori Hill.
Pas një periudhe shkëputjeje 52-vjeçare, marrëdhëniet SHBA-Shqipëri u vendosën në 1 tetor të vitit 1991. Hill u pasua nga Uilliam Rajerson. Por karriera e tij do të vazhdonte me misione të rëndësishme në Kosovë, Irak dhe bisedimet me Korenë e Veriut.
