Ditën e mërkurë u luajtën dy ndeshje të prapambetura në Premier League, aty ku Aston Villa barazoi pa gola me Sheffield United ndërsa Man.City mundi 3-0 Arsenalin.
Ndërkohë ditën e sotme, radhën e ka java e 30-të e kampionatit anglez e cila do të shtihet përgjatë katër ditëve. Gjithçka hapet sot në orën 19:00 me takimin Norwich City – Southampton dhe do të mbyllet të hënën në mbrëmje me sfidën Manchester City–Burnley, që do të luhet në orën 21:00.
Gjithsesi mbrëmjen e sotme të gjithë sytë do të jenë te përballja mes Tottenham dhe Manchester United, ndeshje e cila luhet në “Tottenham Hotspur Stadium” duke filluar nga ora 21:15.
“Djajtë e Kuq” kërkojnë fitoren për të vazhduar misionin e tyre për tu kualifikuar në Champions League ndërsa ky objektiv duket më larg për skuadrën e Tottenham, pasi gjenden plot 7-pikë nga Chelsea i vendit të katërt.
Gjithsesi eliminimi i mundshëm i Man.City-t nga kompeticionet evropiane mund t’i hapë rrugën skuadrës së Mourinhos që këtë qëllim ta arrijë edhe nëse renditet e pesta.
Për vendasit mungojnë Dele Alli, Tanganga dhe Foyth ndërsa është rikuperuar sulmuesi Harry Kane. Nga ana tjetër Man.United do të këtë të gjithë skuadrën në dispozicion.
