Presidenti i Kosovës, Hashim Thaçi, deklaroi sot për Zërin e Amerikës se takimi i 27 qershorit në Uashington është një mundësi e artë. Por ai mohoi se do të flitet për shkëmbim territoresh.
‘Në fazën përfundimtare do të respektohet Kushtetuta e Kosovës, integriteti territorial i saj, sovraniteti i Kosovës pra nuk ka nevojë për asnjë shqetësim por i ftoj të gjithë që të mos krijojnë panik, konfuzion dhe të mos prezantojnë lajme të rrejshme,” tha Thaçi.
Por gazeta e njohur britanike, The Guardian shkruan se ekziston shqetësimi se marrëveshja mund të përfshijë edhe shkëmbimin e territoreve.
“Takimi, i paralajmëruar këtë javë nga i dërguari kontrovers për Ballkanin, Richard Grenell, erdhi si surprizë për kryeqytetet evropiane dhe ngriti shqetësimet se një marrëveshje e nxituar mes Beogradit dhe Prishtinës mund të përfshijë një shkëmbim territoresh, që mund të ketë efekte të paparashikueshme,” shkruan gazeta.
Kurse Corina Stratulat nga Qendra për Politikat Europiane në Bruksel, thotë: “Nëse, dhe do jetë e madhe nëse kjo iniciativë do ketë sukses, do të jetë një shuplakë në fytyrë për BE-në dhe përpjekjet e saj shumëvjeçare për të normalizuar marrëdhëniet mes Prishtinës dhe Beogradit”.
Gazeta shkruan se marrëveshja e nxituar ka për qëllim forcimin e perspektivës që Trump të rizgjidhet president.
“Roli i Grenell, një besnik i Trump, ka qenë i diskutueshëm. Në prill, kryeministri i rrëzuar i Kosovës, Albin Kurti, e akuzoi të dërguarin amerikan se po bën një grusht shteti për ta hequr atë për shkak të skepticizmit të tij për një marrëveshje të mundshme. Kurti tha se Grenell nuk ishte i interesuar për përmbajtjen e marrëveshjes, por vetëm për firmën në fund të letrës, e cila mund të paraqitet si një sukses për Trump në një vit zgjedhor”.
