Pëllumb Karameta u shfaq mbrëmjen e sotme në mbrojtje të testit të Gjuhës dhe Letërsisë. Ai ka habitur në qëndrimin e tij kur tha se ky test mat komunikimin, nuk është test për Gjuhë Letërsinë.
Në vend që të shfaqej si një profesor, një zyrtar me eksperiencë dhe të pranonte minimalisht gabimet në test, ndoshta duke kërkuar edhe falje, Karameta u shfaq si një shërbyes i Qeverisë, Besës së Arsimit, apo edhe Kryeministrit Edi Rama.
Më shumë se një njohës i mirë i arsimit, aq më tepër me një gradë profesori, Karameta u shfaq si një zhurmues, madje edhe shpërfillës, përballë fakteve nga testi që u paraqitën në studio.
“E ça pastaj që paska gabime, logjika është në rregull”, tha ai.
“Ky test ka si qëllim që të bëjë një analizë logjike të testit, synon të aftësojë fëmijët, që kur të mbushin moshën 18 vjeç, të jenë të aftë të komunikojnë”, tha ai.
Duke mos ditur si të mbrojë testin, gabimet e evidentuara në të, Karameto i konsideroi si gabime njerëzore, ndërkohë që këto gabime njerëzore i penalizojnë maturantët dhe i ndryshojnë të ardhmen.
Madje edhe ato gabime që janë pranuar zyrtarisht nga hartuesit e testeve, nuk janë pranuar nga Karameta, që me qëndrimin e tij, të kthente në kohë, dhe të kujtonte Kryetarët e Frontit, që zhvillonin mbledhjet e partisë 1 herë në javë.
“Mund të jenë disa gabime ortografike, por ne duhet të flasim për nxënësit jo për hartuesit e testit. Ka gabime, por janë të përkthimit, janë gabime që nuk ndikojnë te logjika e testit”, tha ai.
Karameta nuk nguroi të sulmojë edhe akademikun Artan Fuga, i cili ka shprehur kritika të forta lidhur me testin e Gjuhë Letërsisë.
“Unë nuk e di se si mund të flasë një akademik me një gjuhë të tillë, nuk e di se si ai shprehet Turi bëri shurrën. Unë se di se çfarë akademiku është ky”, tha Karameto.
Ai u shpreh se testi ka përkthime, por shtoi se edhe gabimet janë faji i përkthimit.
“Punë e madhe, janë gabime ortografike, nuk e prekin testin”, tha ai. Karameto tha se ky test nuk ka gabime logjike, ndërsa Fevziu i kujtoi pyetjes me Turin, duke u shprehur se kjo është pika më qesharake.
“E kanë pranuar edhe vetë hartuesit dhe ju nuk e pranoni”, iu drejtua Fevziu, Karametas.
