Jo vetëm PD, por edhe aleatë të saj, si PR e Fatmir Mediut, PDK e Nard Ndokës, LZHK e Dashamir Shehit, dhe PAA e Agron Dukës, mendojnë se Kryeministri Edi Rama po bën një lojë lidhur me zgjedhoren, veçanërisht përsa i takon koalicioneve parazgjedhore.
Ajo që njihet si “opozita e re” ka paraqitur në Kuvend një draft ku veç listave të hapura kërkohet edhe ndërhyrja në Kushtetutë, për të mos lejuar koalicionet parazgjedhore.
Kjo kërkesë ka gjetur mbështetje edhe nga disa prej deputetëve të PS, ose të afërm me të.
Kërkesa momentalisht është firmosur nga 30 deputetë, por kjo cilësohet si një lojë e dirigjuar nga Edi Rama.
Mediu kërkon një reagim nga opozita e bashkuar, madje ai shprehet se ajo duhet të flasë sot, pasi nesër do të jetë vonë.
Sipas kreut republikan, nëse hiqet e drejta kushtetuese për koalicione parazgjedhore, atëherë përligjet diktatura.
Kreu demokristian Nard Ndoka paralajmëron Kryeministrin Edi Rama se nëse do të tentojë të miratojë ndryshimet Kushtetuese lidhur me koalicionet, atëherë fundin e ka të pashmangshëm.
“Kjo tendencë e Ramës për të ndryshuar Kodin e Kushtetutën më tepër është tallja e fundit, që ju bëri deputetëve të mbetur në Kuvend. Po tallet më to, po i përçan, po i ndërsen kundër njeri-tjetrit dhe do ti përdor ca prej tyre në qellimet e veta politike”, shprehet Ndoka.
Ndërsa kreu i PAA-së, Agron Duka, ndërsa e konsideron përpjekjen si një hile politike, thekson se shpreson që ndërkombëtarët do t´i japin fund intrigave politike.
“Ne si opozitë nuk do të pranojmë asgjë tjetër, përveç dakordësisë që arritëm në 5 qershor, dhe nuk do të lejojmë që agjenda europiane, që përkon me zbatimin e mëtejshëm të kushteve, të merret peng nga Edi Rama. Të gjitha mjetet diplomatike dhe politike, duke përfshirë këtu edhe protestat, do të përdoren me qëllim mbylljen e këtij kapitulli të shëmtuar të ‘Rilindjes”, shprehet Duka.
Gjithashtu PD ka paralajmëruar Ramën se po bën një lojë duke përdorur deputetë të emëruar dhe kontrolluar prej tij kundër marrëveshjes së arritur në Këshillin Politik.
Në listën e deputetëve të “opozitës së re” që kërkojnë ndalimin e koalicioneve parazgjedhore janë përfshirë edhe 3 deputetë jashtë rradhëve të saj, madje të afërt ose pjesë e PS-së. Lefter Koka, Reme Lala dhe Elena Xhina raportohet se kanë mbështetur me firma kërkesën për ndryshime Kushtetuese, duke e çuar në 30 numrin e deputetëve firmëtarë.
Pro nismës së deputetë të njohur si “opozita e re” është shprehur edhe Adnor Shameti i PS-së, i cili dy ditë më parë tha se listat e hapura s´duhet të jenë tabu për socialistët duke shtuar se kjo duhej të shoqërohej me ndalimin e koalicioneve parazgjedhore.
