Partizani ka reaguar në mënyrën më të mirë ndaj kritikave për rezultatet e tyre në ndeshjet e fundit. Kampionët në fuqi të Superligës, shpartalluan me rezultatin 8-1 Luftëtarin duke nxjerrë dufin e një sezoni poshtë pritshmërive.
Gjirokastritët, të rënë një kategori më poshtë matematikisht, kapitulluan shumë shpejt, teksa pësuan katër gola që në pjesën e parë.
Protagonist absolut sulmuesi Erald Çinari, i cili hapi takimin, dyfishoi me një goditje mjaft të bukur dhe në fundin e pjesës së parë plotësoi “pokerin”. Më parë kishte shënuar edhe Broja për Partizanin. Edhe Luftëtari e provoi shijen e golit, madje ai që realizoi Gresild Lika nga goditja e dënimit ishte mjaft i bukur.
Me rezultatin 4-1 ekipet iu drejtuan dhomave të zhveshjes. Ritmi në fillimin e pjesës së dytë nuk ishte i duhuri, por Partizani “ndezi” sërish dhe ishte Cinari ai që realizoi golin e katërt personal, si askush tjetër në Superiore këtë sezon.
Dhjetë minuta nga fundi i kohës së rregullt mendoi edhe Dragoshi ta thellonte rezultatin, por duke shënuar në portën e tij. Dy minuta më pas realizoi edhe Brian Brown, kurse në shtesë Cara me penallti, duke vulosur fitoren e Partizanit me rezultatin e thellë 8-1.
