Ku fjeti shoferi i kamionit në të cilin u kapën gjysmë milion euro në portin e Durrësit, dhe ku ishte parkuar automjeti teksa nga Italia u nis drejt Durrësit?
Janë këto pyetjet të cilat me anë të një letër-porosie hetuesit shqiptarë kërkojnë të dhëna nga kolegët italianë. Report Tv mëson se paratë dhe kamioni janë vënë në sekuestro deri në përfundim të hetimit për akuzën e pastrimit të parave.
Prokuroria e Durrësit dërgon në Itali letërporosi për të zbuluar itinerarin e A.TH shoferit 56-vjeçar të arrestuar mesditën e djeshme në portin e Durrësit me 500 mijë euro të fshehura në trasenë e kamionit që ai drejtonte.
Ku qëndroi shoferi, kë takoi, ku qëndroi i parkuar kamioni dhe kush kreu procedurat e doganës në portin e Barit janë disa nga përgjigjet që hetuesit shqiptarë presin nga homologët e tyre italianë, bëjnë me dije burime për ReportTv.
Ndërsa 498.850 eurot tashmë janë vendosur në sekuestro preventive me vendim të Prokurorisë së Durrësit shoferi ka mohuar të kishte dijeni për këto para. Po ashtu nuk ka parë askënd t’i fshehë në vendin e përshtatur.
Ndërkohë policia po punon edhe për shoqërimin e administratorit të kompanisë JA-ADA sh.p.k në pronësi të së cilës ishte kamioni, po ashtu i sekuestruar.
Ndërkohë policia ka dërguar në laboratorin e kriminalistikës edhe telefonin e shoferit për të kuptuar nëse ka pasur telefonata, mesazhe me persona që mund të qëndrojnë pas kësaj skeme pastrimi parash.
Paratë në pesë qese të zeza ishin fshehur në një aks lidhës të kamionit me karrocerinë ndërsa zbulimi i tyre u bë pas kontrolleve me skaner dhe atë fizik të kryer nga policia kufitare./Shqiptarja.com
