Maturantët kanë nisur protestën para Ministrisë së Arsimit, ashtu sikundër ishte paralajmëruar. Disa dhjetra maturantë janë ulur në rrugën e Durrësit, përballë godinës së Ministrisë, atje ku prej të premtes protestojnë lidhur me testin e Gjuhës Shqipe dhe Letërsisë.
Maturantët kërkojnë një rivlerësim të testit, duke i cilësuar pyetjet pa nivel, por edhe jashtë programit.
Maturantët kanë deklaruar se do të protestojnë edhe nesër, nëse sot Ministria e Arsimit nuk kthen një përgjigje për kërkesat e tyre.
Një prej maturantëve protestues tha se provimi i nesërm i Maturës Shtetërore mund të bojkotohet nëse nuk ka një reflektim nga Ministria e Arsimit, në të cilën dje u depozitua edhe një kërkesë ku përfshiheshin 10 konstatime mbi tezën e provimit të Gjuhës Shqipe dhe Letërsisë.
“Disa prej pikave që janë përmendur tregon që ata nuk i kanë parë fare kërkesat tona, nuk e kanë shqyrtuar fare draftin që ne u kemi dërguar.
Kemi marrë përgjigje vetëm për pikën e emrit (çështja e identitetit) e cila ishte një shkelje e drejtpërdrejtë e të drejtave tona, e privatësisë. Provimet e përgjithshme të shtetit janë zhvilluar gjithmon me kod, ndërsa këtë vit na thanë të shkruanim emrin në krye të testit”, tha maturanti.
Maturantët e pranishëm në protestë shprehen se mbi pjesëmarrësit është ushtruar presion, ndaj edhe sot ka pasur një prezencë të ulët, ndërsa shprehen se neserë protesta do të jenë edhe më e madhe.
“Frika edhe presioni i maturantëve ka qenë shumë i lartë. Nëse ata duan të na shtypin ata e bëjnë këtë vetëm nga emri. E bëjnë nesër në provimin tjetër.
Mbajtja e rrugëve të bllokuara është mënyra duhur që ne të dëgjohemi. Duhet të protestojmë pikërisht përballë përgjegjësit për këtë situatë dhe kjo nuk është QSHA-ja por Ministria e Arsimit”, tha ndër të tjera maturanti.
