Tregjet e Kinës duket se janë kthyer në frikën e mbarë botës për përhapjen e pandemisë së koronavirusit. Pas të dhënave se koronavirusi u përhap nga një treg në Wuhan, një tjetër treg në Pekin risjell panikun për përhapjen e një vale të dytë të mundshme të virusit vdekjeprurës.
Një zonë e gjerë në kryeqytetin kinez tashmë është vendosur në masa shumë të forta izolimi pas shfaqjes së një vatre të re të koronavirusit. Bëhet fjalë për tregun më të madh të Pekinit.
Sipas autoriteteve, 45 persona kanë rezultuar pozitiv me Covid-19 nga 517 të testuar dhe asnjë prej tyre nuk ka simptoma. Tashmë kanë nisur përpjekjet për të testuar të gjithë personat që kanë qenë në treg dhe ata që jetojnë në zonën pranë.
Kjo është vatra e re e koronavirusit në Pekin, i cili nuk raportonte asnjë rast të ri prej më shumë se 50 ditësh.
