Pas provimit të gjuhës së huaj, 31 mijë maturantë u testuan ditën e Enjte në lëndën Gjuhë Shqipe dhe Letërsi.
Me të përfunduar testimi, rrjetet sociale u pushtuan nga postime të shumta, ku maturantët shprehnin pakënaqësi sa i takonte përpilimit të tezës.
Gjimnazistët e cilësuan provimin me pyetje abstrakte apo që gjendeshin jashtë programit. Vëmendje të veçantë mori një nga pyetjet e provimit, e cila kishte në qendër të saj personazhin Turi.
Por cila ishte pyetja e shumëpërfolur?
Barka filloi të rrëshqiste me shpejtësi përgjatë lumit të rrëmbyer, ndërsa katër njerëzit që ndodheshin në të , bërtisnin nga euforia. Zemrat e tyre rrihnin fort, ndërsa manovronin me shkathtësi lopatat përmes ujërave të trazuara. Madje dhe Turi, i cili fillimisht ishte ndjerë i shqetësuar në lidhje me udhëtimin me barkë, e harroi frikën kur valët e akullta përplaseshin mbi të. Papritur, ai vështroi skajet e mprehta të një shkëmbi të dhëmbëzuar që iu shfaq përpara.
Cila nga fjalitë e mëposhtme mund të vijojë në të njëjtin stil aksionin e nisur në paragrafin e dhënë më sipër?
- A) Duke u përqëndruar, Turi u përpoq të kujtonte procedurën e saktë për ta kthyer barkën në një pozicion të sigurt.
- B) Ndërkohë, uji i ftohtë i lumit vazhdoi të përplasej në anët e barkës duke i bërë qull Turin dhe miqtë e tij.
- C) Turi e dinte që ai dhe miqtë e tij ishin të përgatitur për t’ia dalë në situata të tilla.
- D) Turi u hodh në të djathtë për të shmangur shkëmbin dhe gati e përmbysi varkën.
Lidhur me këtë pyetje, janë shfaqur pankarta nga maturantët në protestë, të cilët e cilësuan absurde. Edhe ekspertë të arsimit kanë pasur një qasje të ngjashme.
Shefja e Departamentit të Letërsisë në Universitetin e Tiranës, Lili Sula, në një intervistë televizive, u shpreh:
“Alternativat se si përfundon aksioni i Turit janë të vërteta. Unë nuk e di se cila mund të jetë alternativa e saktë. Unë mund t’i zgjidhja të katërta. Alternativat nuk mund të jenë grackë, nuk mund të diktosh përfundimin, jo ato janë të gjitha të sakta. Nxënësi ka të drejtë të ketë lirinë e tij në raportin me artin”.
Ndërkohë, Drejtoresha e Qendrës së Shërbimeve Arsimore, Rezana Vrapi po në një intervistë televizive, tha dje se përgjigja e saktë ndodhet nën alternativën D: “Turi u hodh në të djathtë për të shmangur shkëmbin dhe gati e përmbysi barkën”.
