Mjeku epidemiolog, Ilir Alimehmeti, tregoi në “Dita jonë” në A2 tre elementet që kanë çuar në rritjen e numrit të rasteve të reja me koronavirus në vendin tonë.
“E para, kur lirohen masat, sa më të forta dhe më të gjata të jenë këto masa, aq më i madh është efekti i lirimit të tyre. Në Shqipëri, masat ishin pak më të forta seç duhej dhe lirimi duhet të kishte nisur më parë.
E dyta, janë shtuar testimet. Këto ditë janë bërë rreth 300 testime, që nuk ishin bërë ndonjëherë.
E treta dhe më e rëndësishmja, vatra spitalore. Ka shumë mjekë dhe pacientë të shtruar në pavionë të tjerë që janë prekur nga Covid-19. Spitali duhet mbrojtur, siç bëri 127 në fillim. Të gjithë në QSUT duhen testuar sepse aty është virusi”, shpjegoi Alimehmeti.
Sipas tij, “distancimi fizik duhet ruajtur, së bashku me higjienën”.
“Ne stilin e jetës nuk e ndryshojmë dot, nuk keni për të parë vëllezër që nuk do të takohen më me njëri-tjetrin. U trembëm, kaluam disa muaj të mbyllur, por nuk do të ndalemi nga kjo”, theksoi mjeku.
Alimehmeti shtoi gjithashtu se “është momenti për të bërë testime serologjike masive, t’i jepet mundësi të gjithë spitaleve që ta bëjnë, për të ditur se sa persona e kanë kaluar dhe për të mësuar sa e madhe ka qenë vala e parë”.
