Në 24 orët e fundit raportohet për zbulimin e 44 rasteve të reja me Covid-19, dy më shumë se një ditë më parë. Nga 291 testime të kryera janë zbuluar 44 raste, 21 prej të cilave janë në Tiranë, shifër e njëjtë kjo me ato të konfirmuara një ditë më parë.
Ndërkohë në Krujë raportohet për 6 raste dhe në Kamëz, Durrës e Shkodër për 4 raste secila. Në Shkodër, është zbuluar një vatër e re në Vaun e Dejës, ku ka nisur hetimi epidemiologjik, ndërsa 3 rastet e tjera janë kontakte të rasteve të mëparshme.
Në Lushnje raportohet për dy persona të prekur me Covid-19, ndërkohë që në Gjirokastër, Vlorë e Elbasan janë zbuluar nga 1 rast për secilin qytet.
Ministria e Shëndetësisë dhe specialistët e ISHP kanë apeluar për ruajtjen e distancimit social dhe kujdesin ndaj higjenës personale, ndërsa i kanë kërkuar qytetarëve të shmangin grumbullimet.
Gjithashtu qytetarëve i është kërkuar të mbajnë maskat mbrojtëse në ambiente të mbyllura apo gjatë kontakteve me persona të ndryshëm
Në ditët e fundit ka pasur një shtim të ndjeshëm të rasteve me Covid-19, ku në 72 orët e fundit raportohen mbi 122 raste me koronavirus në të gjithë vendin.
Ndërkohë ka pasur një rritje të numrit të pacientëve që po trajtohen në spitalin Infektiv, ndërsa 7 prej tyre ndodhen në terapi intensive, ndërsa një pacient ndodhet i intubuar.
