Ministrja e Mbrojtjes Mimi Kodheli ka folur sot për herë të parë për praninë e një grupi ushtarakësh rusë në Shqipëri.
Ministrja e Mbrojtjes tha se ky grup ndodhet në Shqipëri për një procedurë rutinë, veprimtari armëkontrolli në terrene sportive, që rrjedh nga detyrimet si vend anëtar i OSBE-së.
“Rusia është anëtarë e organizatës së sigurisë së OSBE. Bazuar në veprimtarinë e përbashkët, kryejnë veprimtari të armëkontrollit në terrene sportive. Është një aktivitet normal që e zhvillon edhe Shqipëria në vendet e BE-së, dhe normalisht priten edhe vendet e tjera anëtare të OSBE-së. Misioni i tyre mbaron në datë 30 shtator. Respektojmë detyrimet. Nuk ka të bëjë me FA-të, me NATO-n, nuk ka të bëjë me aktivitetin e mirëfilltë të NATO-s. Ka të bëjë me procedurat e armëkontrollit, procedurë rutinë për vendet e OSBE-së. Zonat janë të mirëpërcaktuara dhe merret leje. Asnjë sekret ushtarak nuk transmetohet tek personat përgjegjës. Personat përgjegjës merren vetëm me punën që është caktuar të bëjnë”, deklaroi Kodheli gjatë konferencës së përbashkët për shtyp me homologun e Britanisë së Madhe, Micheal Fallon.
