I ftuar në studion e “Top Show”, ish-deputeti socialist Koço Kokëdhima nuk i ka fshehur më pakënaqësitë që ka me ish-mikun e tij të vjetër kryeministrin Edi Rama.
Ai tha se situata e kultivimit të maijuanës i ka dalë qeverisë nga kontrolli. Sipas tij mënyra se si qeveria po e përballon këtë situatë është e gabuar.
“Represioni, presionet dhe dhuna nuk mund të ndalojnë kultivimin e kanabisit. Duhet një politikë më komplekse. E shikoni si shkojnë njerëzit per 25 mije leke ne ditë të punojnë në pastrimin dhe paketimin e marijuanës? Njerëzit shkojnë që në 4 dhe 5 të mëngjesit si punëtorë të marijuanës. Kanë krijuar vakuum në treg sepse njerëzit nuk shkojnë të punojnë në ara, por kanë shkuar te hashashi. Kërkohen masa ekonomike të veçanta për të luftuar ekonominë ilegale duke rritur punësimin dhe mbështetur ekonominë”- tha Kokëdhima që nuk u ndal me kaq.
“Situata është më keq sesa ka qenë më parë. Nuk është puna për të bërë politikë dhe nuk jam i lumtur që e them këtë. Kemi të bëjmë me një skemë mjaft të organizuar. Prodhuesit duhet të paguajnë një të tretën e prodhimit të tyre. Kemi një skemë që ka në dorë një fuqi të madhe financiare. Kjo është një situatë e vështirë që bie kundër me funksionimin e shtetit në vend” – tha Kokëdhima.
Në fund ai bëri një parashikim dhe një apel.
“Vendi ndodhet përballë një tranzicioni të dytë. Përhapja e këtij fenomeni do të na çojë në një tranzicion të dytë dhe mjaft të përgjakshëm”- ishte parashikimi i fortë i Kokëdhimës.
