Ngahet nga jeta profesori i mjekësisë shqiptare Panajot Boga. Njoftimin e ka dhënë përmes rrjeteve sociale, Rektori i Universitetit të Mjekësisë, Arben Gjata.
“Lamtumirë Profesor!
Sa trishtim lamtumira ndaj kollosëve të kirurgjisë dhe mjekësisë shqiptare!
Do na mungojë energjia e pashuar, dashamirësia e pamasë, profesionalizmi pa cak!
Do na mungosh njeriu Panajot Boga, por do mbetet mes nesh profesionisti shembullor me gjithçka na le trashëgim!”, shkruan ndër të tjera Gjata në rrjetet sociale.
Disa vjet më parë, Shërbimi i Ortopedisë në Spitalin Ushtarak ka marrë emrin Panajot Boga, në nder të kontributit të madh që mjeku i njohur ka dhënë për këtë spital dhe per mjekësinë shqiptare në tërësi.
Gjithashtu Boga është dekoruar me titullin “Mjeshtër i Madh” me motivacionin: “Për kontribut të shquar në mjekësinë shqiptare, veçanërisht në krijimin e zhvillimin e ortopedisë dhe traumatologjisë, në fushën e kërkimit shkencor e përgatitjen e shumë brezave të mjekëve të rinj.”.
