Lidhja Demokratike e Gruas së Shqipërisë mbajti në Tiranë konferencën “Beso te gratë” në 25-vjetorin e krijimit të forumit politik të gruas në Partinë Demokratike “1991-2016”. Kryetarja e LDGSH-së, deputetja Albana Vokshi deklaroi se sot pas 25 vjetësh vendi rrezikon të kthehet në diktaturë dhe se qeveria po bën pakte fatale me mafien për të shkatërruar rendin demokratik në Shqipëri.
“Sot, pas 25 vjetësh, perspektiva e vetme që po ofrohet nga pushteti për shqiptarët, por më së shumti për gratë është trekëndëshi:
1) Plehra,
2) Drogë dhe Prostitucion
3) Varfëri dhe azilim
Sot të gjithë treguesit realë të Barazisë Gjinore janë përkeqësuar. Nuk po flasim për numrat e ministreve, deputeteve, drejtoreshave që qartësisht nuk kanë sjellë politika mbështetëse për rritjen e mirëqenies të grave. Po flasim për gratë dhe vajzat që shfrytëzohen në punë të zezë, po flasim për gratë dhe vajzat që nuk kanë punë, nuk kanë të ardhura për të mbajtur veten dhe familjen. Vetëm para disa ditësh drejtoresha e lajmeve të një TV u pushua nga puna me porosi të Kryetarit të bashkisë vetëm për shkak të një investigimi që publikoi të dhëna tronditëse se fëmijë, grat dhe vajza shfrytëzoheshin për punë të rënda në mes të ditës, në mes të Tiranës. Zgjedhjet 2017-ës nuk kanë asnjë garanci zgjedhore. Propozimet e PD për reformën qëllimisht po vonohen. Sepse maxhoranca ka menduar për një “fenomen Dibror” të multiplikuar në zgjedhjet e ardhshme duke përdorur madje edhe kryetaret e Këshillave Bashkiake për të shpërndarë para “derë më derë”, apo duke shpërdoruar ndihmën ekonomike për të blerë vota!!! Ndaj reforma zgjedhore është emergjencë! Ndaj edhe ne duhet të kemi zërin tonë dhe rolin tonë në këtë reformë! Sot është koha që të reagojmë! Është koha për një revolucion shoqëror dhe gratë duhet të ndihmojnë që të marrë jetë kjo lëvizje për ta kthyer pushtetin nga mafia te qytetarët”, deklaroi Kryetarja e LDGSH-së, Deputetja Albana Vokshi
Aktiviteti u mbështet nga fondacioni Kondrad Adenauer Stiftug dhe e ftuar e veçantë ishte Sekretarja e Përgjithshme e Forumit të Gruas së Partive Popullore Europiane, znj. Hillie van de Streek, e cila shprehu shqetësim për gjendjen sociale të grave dhe presionin publik të Kryeministrit ndaj grave në Parlament dhe në vendim-marrje. Në forumin e Lidhjes Demokratike të gruas së Shqipërisë referuan deputetë, kryetare bashkie, këshilltare bashkiake, përfaqësues të organizatave politike, pedagoge, sipërmarrëse dhe aktivistet e te drejtave të grave..
Lidhja Demokratike e Gruas së Shqipërisë është forum i Partisë Demokratike dhe drejtohet nga deputetja znj. Albana Vokshi. LDGSH vepron që prej vitit 1991 si një organizatë vullnetare e grave dhe vajzave, aktiviste të proceseve demokratike në Shqipëri. LDGSH është organizata më e madhe politike e grave në vend me mbi 20 mijë anëtare që promovon barazinë gjinore, mbrojtjen e të drejtave të grave dhe vajzave, fuqizimin e statusit të gruas në nivelet vendim-marrëse, të shprehura edhe në programin e Partisë Demokratike.
LDGSH-Lidhja Demokratike e Gruas së Shqipërisë është anetare e Forumit të Gruas të Partive Popullore Europiane (EPPWomen)
