Për Dritan Shanon, produkti që doli nga diskutimet e Këshillit Politik dhe tryezat me praninë e ambasadorëve, në mënyrë të padrejtë quhet reformë zgjedhore. “Më shumë sesa reformë është rregullim teknik i mënyrës sesi do të lexohet vota”, tha analisti, i ftuar në Ditarin e A2.
“Kemi parë raste kur KQZ është bërë palë me leximin e gabuar të votës. Vota e qytetarëve është e shtrënguar, nuk është e lirë. Për këtë arsye kemi fenomenin e shitblerjes, sepse qytetari e ndjen këtë votë të pavlefshme, sepse nuk është preferenca e tij. Kjo është gjëja që duhet të ishte diskutuar, por po diskutojmë sesi këtë votë të manipuluar nga qytetarët, ta lexojmë me përpikmëri. Prandaj nuk e klasifikoj si reformë, por ”depilim” të sistemit zgjedhor”.
Sipas Shanos, qytetari shqiptarë është ndarë nga vota që pas ndryshimeve të sistemit zgjedhor të vitit 2008. “Kemi një sistem që favorizon partitë politike, kryetarin, por kurrsesi qytetarin. Për këtë arsye palët politike ruhen fort nga njëra-tjetra. Prej këtij sistemi u krijua Rilindja. Ky sistem e favorizon këtë lloj sjellje. Do të dëshiroja të luftoja në çdo mundësi që më jepej, për sistemin maxhoritar të pastër. Kjo dobëson në mënyrë shumë të shëndetshme kryetarin e partisë. Ky është edhe propozimi i kryetarit të PD, Basha, nuk e kuptoj pse nuk e futi pjesë të diskutimeve të Këshillit Politik”, tha ai.
Nano-Berisha dhe Rama-Basha
Në historinë 30-vjeçare të demokracisë në Shqipëri, është e vështirë të gjesh një marrëveshje politike pa ndërmjetësim ndërkombëtar. “Kujtoj marrëveshje sa i përket ndarjes së pushteteve nga zoti Berisha dhe zoti Nano. Nuk kanë qenë aq të mundimshme. Ata të dy besonin më shumë te forcat e veta dhe te shqiptarët sesa liderët aktualë”, u shpreh Shano.
“Lidershipet politike tmerrohen nga resurset që ka ambasada amerikane”
Për Shanon, është e pazakontë sesi ambasadorët kanë marrë përpara këtë klasë politike në një vend ku ne mendojmë të bëhemi anëtarë të BE-së. “Unë mendoj që kjo vjen nga që besueshmëria e lidershipit politike është ulur shumë dhe besimi mes palëve është inekzistent”, tha Shano.
“Përveç faktit që të adoptosh një sistem, duhet të kesh qytetarë danez, nuk kam koment tjetër. Përpiqem ta mirëkuptoj këtë protagonizëm të ambasadave. Ata kanë aftësi dhe mundësi reale për të presion ndaj liderëve politikë, për arsye që shqiptarët nuk i dinë.
Dy pika ku duhet të bëjnë presion ambasadorët
“Mendoj që presioni i tyre duhet të përqendrohej fort në dy pika: Reformën në Drejtësi, një pikë që cenon fort rezultatet zgjedhore. Në mungesë të një sistemi juridik, shteti ka rënë dhe marrin forcë individë dhe organizata që duhet ta kishin frikë drejtësinë. Nëse do të donin të mbronin interesin e qytetarëve shqiptarë, atëherë do të duhet të përqendronin vëmendjen të ndryshimi i sistemit, që dobësoj “Bajlozët” e politikës dhe forcon qytetarët shqiptarë.
Do të më vinte shumë keq nëse ambasadat do të vazhdojnë t’i bien fyellit që Basha është i keqi dhe Rama është i miri. Kemi prova me zë dhe me figurë se si individë kriminelë kanë caktuar deputetët dhe kanë mbushur parlamentin me bekimin e zotit Rama.
Ambasada amerikane di gjëra mjaftueshëm, vetëm se vendos t’i përdorë ato kur e sheh të përshtatshme. Siç është rasti i presionit publik, apo lëshimit të emrave që nuk i lejon të vizitojë Shtetet e Bashkuara. Ajo që më shqetëson mua është pse lidershipet politike tmerrohen më shumë nga resurset që ka ambasada amerikane”.
“Topi” i Bashës
“Unë mendoj që zoti Basha duhet të pranojë menjëherë çfarë ka në tavolinë, në mënyrë që të ikë një orë e më përpara nga ky ngërç me shumë mjeshtëri nga Rama dhe enturazhi i tij, që përpiqet ta portretizojë Bashën si personin që po pengon reformën, kur dihet çfarë ka bërë Basha. Shpresoj që PD të jetë fituese e zgjedhjeve të ardhshme”.
