“Incidenti me biznesmenin libanez, një ngjarje fatkeqe. Shqipëria duhet të sigurojë një klimë biznesi të rangut botëror’. Kështu ka deklaruar përfaqësuesja e Bankës Botërore Tahseen Sayed e cila e ka cilësuar si ngjarja fatkeqe rrahjen e biznesmenit libanez në Shqipëri.
Ajo i ka bërë thirrje që Shqipëria të sigurojë një klimë biznesi të rangut botëror.
Më pas përfaqësuesja e Bankës Botërore është ndalur te rritja ekonomike e Shqipërisë, kriza e vendeve fqinje dhe rritja e pagave dhe pensioneve.
“Përsa i përket rritjes së pagave dhe pensioneve vitin e ardhshëm, qeveria të gjejë mundësinë përmes administrimit fiskal e rritjes së të ardhurave.
Ekonomia shqiptare performancë pozitive, por rrezikohet nga klima politike. Paqëndrueshmëria politike mund të ndikojë drejtpërdrejt në zhvillimin e ekonomisë. Ekonomia shqiptare mund të ndikohet nga situata në vendet fqinje. Shqetësimet mund të vijnë edhe nga Turqia për shkak të lidhjeve tregtare” deklaroi ajo.
Tahseen Sayed ka komentuar edhe debatin e fortë për koncesionin e Rrugës së Kombit duke deklaruar se nuk mund të ndërhyjë mes institucioneve shqiptare.
“Nuk mund të ndërhyjmë mes institucioneve shqiptare për përplasjen mbi koncesionin e Rrugës së Kombit.
I takon ta zgjidhin ministria e Transporteve dhe komisioni i prokurimeve publike. Presim përfundimin e procedurës së apelimit nga ministria”, u shpreh Sayed.
