47-vjeçari i arrestuar sot në Kurbin pasi u kap me 320 gramë kokainë, rezulton se është vëllai i kreut të Komisariatit të Policisë Dibër, Robert Aga.
Pajtim Aga, u arrestuar nga Seksioni kundër Narkotikëve në Drejtorinë Vendore të Policisë Lezhë, në bazë të informacioneve të siguruara në rrugë dhe gjatë kontrollit në automjet iu gjet sasia e kokainës.
Aga, banues në Tiranë, u arrestua në Lezhë pasi gjatë kontrollit të ushtruar në automjetin e tij , i’u gjet dhe sekuestrua në cilësinë e provës materiale kokaina e paketuar. Policia dyshon se Aga merret me shpërndarjen e drogës. Ndaj 47-vjeçari do të rëndojë akuza e “Prodhim dhe shitje e narkotikëve”.
Shefi i Komisariatit të Policisë Dibër, Robert Aga ka qenë një nga personat më të akuzuar nga Partia Demokratike si i përfshirë në blerjen e votave gjatë procesit zgjedhor për Bashkinë Dibër.
PD ka depozituar në Prokurori për Agën dhe një kallëzim duke e cilësuar pjesë të të grupit të strukturuar kriminal për blerje votash në fushatën e Dibrës./Panorama
