Një nga autorët e vjedhjes së një shume të madhe parash, 200 mln lekëve dhe 50 mijë frangave në automjetin e parkuar në një qendër tregtare në Tiranë është vëllai i Greta Hoxhajt, spikerja e lajmeve në televizionin “Zjarr”.
Burimet bënë me dije se autorët, Donald Hoxha dhe Gentian Kane, janë zbuluar nga targa e makinës që përdorën për t’u larguar pas ngjarjes.
Spikerja Greta Hoxha është telefonuar nga oficerët e hetimit dhe i kanë kërkuar të paraqitet në polici së bashku me mjetin e saj.
Por spikerja u ka thënë se ndodhej në Fier. Për makinën, ajo ka treguar se që prej 22 majit atë e ka pasur në përdorim vëllai i saj Donaldo Hoxha.
Edhe ky i fundit është telefonuar nga policia, por ka deklaruar se gjithashtu ndodhej në Fier. Por pas kësaj telefonate, në policinë e Tiranës ka telefonuar një avokate e cila ka shprehur se do paraqitej në polici së bashku me Donald Hoxhajn dhe Gentian Kanen për t’u vetëdorëzuar së bashku me shumën e parave që kishin vjedhur.
Sapo janë paraqitur në polici, dy të rinjtë janë arrestuar.
“Nga veprimet hetimore rezultoi se këta dy shtetas kishin ndjekur lëvizjet e shtetasit F. B. dhe në momentin që ky shtetas është futur në qendrën tregtare, ata i kanë vjedhur shumën e parave në bagazhin e automjetit. Në momentin e kapjes, këtyre shtetasve iu janë gjetur dhe sekuestruar në cilësinë e provës materiale një sasi parash prej 17.5 milion lekësh të reja dhe 50 mijë franga”, njoftoi Policia dje.
/Panorama/
