Mbrëmjen e djeshme, Vlora u trondit nga një atentat me armë zjarri ndaj 25-vjeçarit Kristjan Breshanaj, duke e lënë të vdekur në derën e shtëpisë së tij.
Një nga fqinjet e viktimës tregon për mediat se Breshanaj nuk ishte problematik, ndërsa qëndronte në shtëpi, pasi nuk punonte.
E moshuara tregoi mes të tjerash se kishte dëgjuar ulërima gjatë natës, dhe mendonte se mos dikush ishte i sëmurë. Ndër të tjerat ajo tha se një prej plumbave që kanë qëlluar autorët, ka hyrë në derën e një prej fqinjëve.
“Djali nuk ishte problematik. E kishim gjiton këtu. Shikonte punën e tij, ishte djalë i qetë. Nuk punonte, rrinte në shtëpi. Unë mendova se ishte ndonjë e sëmundje, se bërtisnin. Fqinja ka plumbin në derë. Nuk e dimë se pse mund të jetë vrarë. Ishte djalë i mirë. Babain e ka mjek, nënën mësuese. Ata janë dy fëmijë, një djalë jeton jashtë në Amerikë. Viktima ishte i vogli, tjetri është i martuar”, tha fqinja.
Ngjarja e rëndë ka ndodh në orët e para të së dielës, pak pas mesnate, në afërsi të banesës së viktimës. Dyshohet se autorët e kanë pritur në hyrje të banesës 25 vjeçarin ndaj të cilit kanë qëlluar me breshëri.
Në trupin e viktimës janë gjetur 5 plumba, ndërsa 1 orë pas krimit, rreth orës 02:00, policia ka gjetur një automjet tip BMW me targa greke, i cili ishte i djegur.
Dyshohet se automjeti është përdorur në krim. Brenda makinës është gjetur edhe një armë automatike, që po i nënshtrohet ekspertizës.
VIDEO+FOTO/ Vrasja në Vlorë, 25-vjeçari u qëllua me breshëri. Automjeti me targa greke
