Dynamo Dresden e cila militon në Bundesligën 2, ka konfirmuar rastin e katërt pozitiv me coronavirus.
Fillimisht në skuadër rezultuan pozitivë dy futbollistë, ndërsa menjëherë i gjithë ekipi dhe stafi teknik u vendos në karantinë ku iu nënshtrohen testeve më të hollësishme. Pas daljes së rezultateve u konfirmua se një tjetër lojtar dhe një pjesëtar i stafit teknik kanë rezultuar pozitiv.
Siç njoftojnë mediat gjermane, ata do të izolohen, ndërsa pjesa tjetër e ekipit do të rifillojë stërvitjen duke filluar nga e shtuna.
“Departamenti i Shëndetit në Dresden ka vepruar në mënyrë të përgjegjshme dhe korrekte duke karantinuar ekipin tonë në shtëpi dhe kjo na mundësoi të shmangim një zinxhir infeksioni brenda ekipit në një fazë të hershme,” – tha mjeku i skuadrës të Dresden Onays Al-Sadi.
