Deklarata e pedagogut dhe analistit Mark Marku për aktorin Robert Ndrenika pas shembjes së teatrit ku ku e ka quajtur një “leckë të poshtëruar në prag të pleqërisë” ka hapur shumë debat.
Ndaj kësaj deklarate ka reaguar dhe aktori i humorit Agron Llakaj i cili e ka “sulmuar” pedagogun duke thënë se Ndrenika është ikonë e Shqipërisë.
I pyetur në lidhje me këtë reagim, Marku shprehet për emisionin Ditë e Re në RTV Ora se Llakaj duhet të merret më shumë me shembjen e teatrit.
Ai sqaron se komenti ndaj Ndrenikës nuk ka të bëjë me aftësinë e tij si aktor, por me mosreagimin e tij ndaj shembjes së Teatrit Kombëtar.
Mark Marku: Unë nuk i përgjigjem fare pasi i njoh të drejtën të gjithëve të thonë çfarë të duan. Njësoj siç e njoh të drejtën time për të thënë çfarë mendoj. Në thelb kjo nuk ka kuptim. Aktorët janë të rëndësishëm se ata e bëjnë teatrin por teatrin e bën edhe publiku. E bën dhe historia. Teatri si institucion nuk lidhet me aktorë të caktuar, sado të mirë të jenë ata. Teatri duhet të rezistojë dhe ne të gjithë që jemi më të rinj se z. Ndrenika do të vdesim, por nuk do të thotë se duhet të shkatërrojmë Shqipërinë. Unë të shkatërroj fakultetin në momentin që do të dal në pension. Apo të gjithë të shkatërrojmë Shqipërinë. Çdo person është i rëndësishëm në shoqëri por institucionet janë shumë të rëndësishme.
Është papërgjegjësi. Dhe Agron Llakaj duhet të merret me faktin që shembet apo nuk shembet teatri. Ne kemi të drejtë të gjykojmë të gjithë personat. Unë nuk kam se si ta gjykoj si aktor Robert Ndrenikën. Ne i gjykojmë në raport me këtë akt. Gjesti që ata kanë bërë nuk ka lidhje me të qenit aktor. Ka të bëjë me të qenit vandal. Mund të jesh shumë artist i mirë por je vandal në shpirt. Ka pasur artistë shumë të mirë por që kanë mbështetur kauza të gabuara. Ka pasur momente që kanë kërkuar falje. Shoqëria i kërkon artistëve që të mos mbrojnë kauza të gabuara. Statusin artistik që kanë e venë në shërbim të disa mafiozëve qeveritarë që shembin teatrin. Fakti që Robert Ndrenika është i madh nuk na bën që të mos gjykojmë aktin e mbështetjes të disa vendimeve për shembjen.
