Myrto Uzuni aktivizohet për skuadrën e Lokomotivës së Zagrebit në Kroaci. 24-vjeçari ashtu si dhe pjesa më e madhe e futbollistëve e ka vuajtur mungesën e aktivitetit futbollistik në këtë kohë pandemie, ndërsa shpreson se me rifillimin e kampionatit do të rigjejë formën e tij.
Duke folur për FanZone në Supersport, ai gjithashtu foli edhe për të ardhmen e tij, ku deklaroi se ka marrë ftesë nga dy ekipe të La Ligës, ndërsa e cilëson kampionatin spanjoll të përshtatshëm krahasuar me cilësitë e tij.
Sa ju ka munguar kampionati?
Isha në një formë mjaft të mirë në javët e fundit, por erdhi kjo ndalesë, që nuk ishte vetëm për mua, por globale, ndaj uroj të rikthehem aty ku e kam lënë.
Si është gjendja fizike?
Në fakt në kushtet e shtëpisë nuk ishin mundësitë për t’u stërvitur mirë, por prej 20-25 ditësh jemi në fushë dhe avash-avash po rikthehem në gjendjen më të mirë fizike.
Sa mendon për Kombëtaren dhe a beson se e meriton një ftesë në grumbullimin e ardhshëm?
Normalisht që e meritoj, pasi po kaloj një formë mjaft të mirë, krahasuar edhe me futbollistët e tjerë të atij reparti. Megjithatë unë jam i përqendruar të bëj më të mirën dhe të jem në formë, pasi jam i sigurt që ftesa nuk do mungojë. Dua të vij dhe të luaj, jo thjesht të jem i pranishëm.
Cilin kampionat preferoni?
Besoj se për cilësitë që kam, do të gjeja veten shumë mirë në La Liga. Janë dy klube që kanë shfaqur interes të vazhdueshëm dhe kanë paraqitur edhe ofertat zyrtare, por të shohim si do shkojnë gjërat.
