Kazanë mbeturinash dhe karrige janë nxjerrë në mes të rrugës në Laprakë. Siç shihet në pamjet e siguruara, ato bllokojnë qarkullimin e automjeteve.
Në pamje dallohen dhe disa karrige. Ende nuk dihen shkaqet. Këto pamje, vijnë në kohën kur në qendër të kryeqytetit artistët dhe disa aktivistë të mbështetur dhe nga opozita po protestojnë pranë Teatrit Kombëtar.
Protesta që po zhvillohet te Teatri ka shtuar frikën e Policisë së Shtetit, se qytetarët mund të vijnë nga qytetet e tjera dhe situata të dalë jashtë kontrollit.
Mësohet se me urdhër të Policisë së Shtetit është mbyllur qarkullimi drejt Tiranës në Elbasan, Fier, Kukës dhe Durrës.
Kujtojmë se mëngjesin e sotëm fadromat shembën Teatrin. Disa aktivistë, artistë dhe drejtuesit e opozitës u shoqëruan në komisariat pasi po protestonin.
Ndaj disa qytetarëve është ushtruar edhe dhunë nga policia. Prishja e Teatrit ka nisur në kohën kur artistët ndodheshin brenda tij mëngjesin e sotëm.
