Në ditët e fundit, në Mitrovicë të Kosovës janë shënuar tri raste me COVID-19 te fëmijët. Bëhet fjalë për fëmijë të moshave 1, 2 dhe 3 vjeç.
Edhe pse, ekspertët kanë paralajmëruar se koronavirusi i ri po “i kursen” moshat e reja, në Kosovë të infektuarit nga 0 deri në 9 vjeç, përbëjnë gati 10 % të numrit të përgjithshëm prej 945.
Sipas Ministrisë së Shëndetësisë, deri më tani janë shënuar 87 raste te fëmijët nga 0 deri në 9 vjeç, ndërkohë një më pak, 86 te grupmosha nga 10 deri në 19 vjeç.
“Fatmirësisht nuk ka të vdekur te këto grupmosha”, thuhet në një përgjigje të MSH-së.
Që nga 13 marsi, kur në Kosovë u paraqit rasti i parë me koronavirus, deri më tani, janë shënuar 945 raste. 29 pacientë kanë vdekur si pasojë e COVID-19, ndërkohë që 690 janë shëruar.
