Superaksioni i policisë në veri të Italisë ku rezultoi me 99 të arrestuar, shqiptarë, grekë dhe italianë kishte në krye dy vëllezrit nga Saranda, Dhimitër dhe Xhevait Poti.
Këta të fundit që nga maji i këtij viti ndodhen të mbyllur në burg, në Belgjikë.
Në përfundim të Operacionit ndërkombëtar antidrogë “Ring new” janë paditur 196 të tjerë; janë shpartalluar 5 organizata kriminale; janë sekuestruar gati 5 tonë lëndë të ndryshmë narkotike; një pasuri me vlerë prej rreth një milion eurosh, si dhe 550 mijë euro “cash”.
Në qendër të rrjetit ishte një grup shtetasish shqiptarë, që vepronin në bashkëpunim me organizatat kriminale famëkeqe italiane “Sacra Corona Unita”, “Camorra” dhe “Ndrangheta”.
50 vjeçari Dhimitër Poti është një biznesmen nga Saranda i njohur në media si ish-pronar i kompanisë së ilaçeve “Chim Prod”. Kjo kompani po hetohej për pastrim parash nga njësia Task-Forcë në prokurorinë e Tiranës, për lëvizjen e dyshimtë të mbi 800 mijë eurove.
Dhimitër Poti rezulton të jetë njeriu kryesor i drejtimit të grupit kriminal të trafikut të drogës në disa shtete të Bashkimit Europian, grup në të cilin sipas autoriteteve greke bën pjesë dhe drejtori i Transportit në Sarandë, Klemend Balili ose “Keli”.
Ngarkesat e heroinës dhe kokainës mbërrinin nga vendet amerikano-jugore me kamionë, bashkë me fruta e perime importi, ndërsa marijuana e kultivuar në Shqipëri transportohej më mjete lundruese nga Greqia në Puglia. Më pas ajo shpërndahej në pikat e krijuara në Napoli, Brescia dhe Romë, për të mbuluar tregjet e të gjithë vendit.
