Lëvizja Socialiste për Integrim ka dorëzuar në Kuvend një amendament për ligjin e mbetjeve. Amendamenti është propozuar nga kreu i grupit të LSI, Petrit Vasili dhe synon t’i japë mundësi shoqërisë civile të ketë rol aktiv në procesin e shqyrtimit dhe zbatimin e ligjit në praktikë.
“Qëllimi i ndryshimeve të propozuara në ligj, të cilat po shqyrtohen nga Parlamenti, është importimi i mbetjeve të ngurta jo të rrezikshme të listës së gjelbër si lëndë e parë dytësore, për të plotësuar nevojat e industrisë ricikluese të vendit, për qëllime riciklimi dhe përdorimi si zëvendësues të lëndëve të tjera nga burime jo të rinovueshme, që përdoren nga industria. Ndryshimet e propozuara janë shoqëruar nga një debat i gjerë publik ku mosbesimi është i forte dhe i dukshëm. Një klimë e tillë mosbesimi besoj se mund të gjente zgjidhjen e saj më të mire duke i mundësuar opinionit dhe veçanërisht shoqërisë civile si mënyra e organizimit të pavarur qytetar, që ajo të ishte aktive në procesin e monitorimit pasi është një fakt i njohur që debati për çështjen e importit të mbetjeve është debat që zhvillohet prej disa vitesh”, deklaron Vasili.
Amendamenti që propozohet duke shtuar këtë pike 3, sipas Vasilit krijon dhe një raport të ri bashkëpunimi me shoqërinë civile, i cili shëndosh raportet mes parlamentit, ekzekutivit dhe opinionit publik nga ana tjetër.
“Vetëm transparenca, e cila është edhe thelbi i amendamentit të propozuar nga unë me shtimin e pikës 3, është kontributi më i mire për këtë raport, i cili duhet të priret gjithmonë nga konstruktiviteti që zgjidh problemet dhe përmirëson zbatimin praktik të legjislacionit”, shprehet Vasili.
Sakaq, në një komunikim me gazetarët pas takimit të zhvilluar dje me ambasadoret e SHBA dhe BE në vendin tonë, Vasili ka sqaruar se në amendamentin e paraqitur nga LSI për ligjin e mbetjeve, ka një pikë shtesë. Sipas tij, synohet që procesi të jetë transparent, dhe Shoqëria Civile të ketë mundësi të monitorojë nga afër nëpër Dogana ecurinë e punës.
“Problemi i trajtimit të mbetjeve është delikat në Shqipëri. Ka dy momente. Së pari është një realitet faktik që funksionin në Shqipëri, pasi ka firma që punojnë në këtë fushë dhe janë punësuar disa persona. Së dyti ka një sensibilitet të thellë lidhur me këtë çështje. Reagimi ka kulmuar me veprimin e shoqërisë civile. Kjo është një çështje që kërkon të adresohet dhe kërkon një përgjigje të drejtpërdrejtë. Amendamenti i dorëzuar nga ne, synon transparencë. ne kemi propozuar një pikë shtesë e cila i mundëson Shoqërisë Civile që të jetë prezente gjatë procesit. Të kenë mundësi të pajisen me dokumentacionin për ta kryer këtë ndjekje në doganat ku do të kryhet. Është pozitive që ky monitorim të kryhet. Duke i prekur me dorë gjërat do mund të konstatohet në praktikë si funksionojnë gjërat”, u shpreh Vasili.
