Kreu i Bankës së Shqipërisë, Gent Sejko ka paralajmëruar se goditja ekonomike e dhënë nga pandemia e coronavirusit do të ketë pasoja të mëtejshme, teksa tha se pritet të ketë sërish rënie ekonomike.
Gjatë një takimi, Sejko shtoi se përmasat e kësaj rënies ekonomike nuk janë parë në dy dekadat e fundit.
“Ekonomia shqiptare pritet të pësojë një rënie të fortë të aktivitetit ekonomik gjatë vitit 2020, do të shoqërohet me rritje të papunësisë, rënie të të ardhurave dhe vështirësi financiare për familjet dhe bizneset,” deklaroi Sejko.
Guvernatori tha se gjurmët e pandemisë do të jenë të dukshme edhe në sektorin bankar; si dhe shtoi se stimujt fiskal dhe financiar do të lehtësojnë këtë barrë për ekonominë.
Kryetarja e Bashkimit të Dhomave të Tregtisë dhe Idustrisë, Ines Muçostepa, e pranishme në takim, kërkoi nga qeveria një paketë të tretë financiare për biznesin e madh.
