Opozita nuk do të paraqesë një propozim të sajin për çështjen e ndryshimit të sistemit zgjedhor. Kreu i Partisë Republikane, Fatmir Mediu në një intervistë për “ABC News” deklaron se për aq kohë sa vullneti për ndryshime kushtetuese mungon, palët do të fokusohen vetëm te ndryshimet teknike të Kodit Zgjedhor.
“Çështja e sistemit për Gjykimin tim ka qenë dhe ngelet gjithmonë çështje Kushtetueshmëri, të një Parlamenti Kushtetues që duhet të jetë çështje kryesore. Le ta shikojmë realitetin ashtu siç është, nuk shikoj që ka disponibilitet për të pasur një Reformë Zgjedhore të thellë që ti shërbejë zgjedhjeve të lira dhe të ndershme.
Historia politike pas vitit 2013 ka treguar një zvarritje pafund të procesit të Reformës Zgjedhore e cila më pas ka sjellë edhe pasoja në procesin zgjedhor. Besoj që çdo gjë duhet filluar tek ideja për të krijuar një vullnet politik të përbashkët dhe më pas të gjithë elementët ligjor kur ekziston vullneti politik, zgjidhen dhe bëhen të implementueshëm”, u shpreh Mediu.
Pavarësisht se nuk do të ketë ndryshim të sistemit zgjedhor, aleatët e Bashës nuk kanë hequr dorë nga propozimi i tyre për ndryshim në Kodin Zgjedhor sa i takon krijimit të grupimeve politike brenda një koalicioni zgjedhor.
“Propozimi nuk ka të bëjë me interes specifik për të dëmtuar, por për ti dhënë më shumë frymëmarrje jetës politike, por edhe koalicionit që kemi krijuar”, tha Mediu.
Kryerepublikani e sheh të panevojshëm një takim Rama-Meta-Basha, duke kujtuar se vullneti i palëve për të bashkëpunuar është në provë me atë që do të ndodh me reformën zgjedhore.
“Vendi ka nevojë për mirëkuptim politik që secili të bëjë punën e tij. Kryeministri të bëjë punën e tij, Presidenti të bëjë punën e tij dhe Opozita punën e saj. Puna e Kryeministrit është të respektojë Kushtetutën dhe ligjin.
Puna e Opozitës është të krijojë një alternativë të qartë në bashkërendim me qytetarët shqiptarë. Puna e Presidentit është që të jetë garant i unitetit të popullit nëpërmjet respektimi të Kushtetutës. Nuk mendoj që një ulje sjell një gjë të mirë, përveçse një percepsion që po ulen
Nëse flasim për tu ulur duhet të flasim për çështje konkrete”, tha më tej Mediu.
Mëngjesin e të mërkurës, të mandatuarit politik të mazhorancës dhe opozitës do të diskutojnë mbi draftet e paraqitura nga Rudina Hajdari për ndryshim të sistemit zgjedhor, drafte për të cilat mazhoranca ka kërkuar të vlerësohet kushtetueshmëria./abcnews.al
