Përpara fillimit të sezonit 2019-2020, Stefano Sensi kaloi nga skuadra e Sassuolos te Interi në formën e huazimit për një periudhë 1 vjeçare.
Por duket se aventura e italianit do të vazhdojë në Milano përtej kësaj vere, pasi zikaltërit kanë vendosur të blejnë përfundimisht kartonin e tij.
Të paktën këtë pretendim ka Giovanni Carnevali, manaxheri i përgjithshëm i Sassuolos. “Interi do të ushtrojë të drejtën e blerjes së Sensit, nuk ka dyshime për diçka të tillë”, komenton Carnevali për Ceramicanda.
Aventura e Sensit te Interi ka shkuar më së miri pasi lojtari është integruar në skemat e Antonio Contes. Gjithsesi në pjesën e dytë të sezonit disa dëmtime ndikuan për keq dhe 24-vjeçari humbi disa ndeshje të rëndësishme të Interit. Por tani, ai është rikuperuar dhe është gati për rifillimin e Serie A.
