“Vendosa sot, të kandidoj për kryetar të Lsi-së! Nuk mund të vazhdojmë më kështu, shumë gjëra duhet ti ndryshojmë në bashkëqeverisjen..!!!. kështu është shprehur me anë të një statusi në Tëitter deputeti Përparim Spahiu.
Ai është një nga deputetët e shumtë që pak herë janë bërë protagonistë të ngjarjeve të mëdha politike. I zgjedhuri i LSI-së për qarkun e Dibrës zuri vend në faqet e para të gazetave dhe mediat online gjatë diskutimeve të reformës në drejtësi. Shkak u bë një koment i tij kundër rolit vendimmarrës të ndërkombëtareve në procesin e vetingut. Kjo deklaratë u konsiderua e papranueshme nga LSI dhe për këtë në një mbledhje të grupit parlamentar ai u përjashtua nga ky grup. Në vijim Spahiu ka mbajtur sërish një profil të ulët duke votuar si grupi i LSI-së pavarësisht se ishte përjashtuar prej tij. Tashmë ai ka vendosur të kandidojë për kryetar të LSI-së përballë Ilir Metës.
Ende nuk është i qartë ky vendim Spahiut dhe nëse hyrja e tij në garë është një akt i tij i pavarur. Për këtë post garon vetë Ilir Meta dhe Shezai Rrokaj, kryetar i grupit të këshilltarëve të LSI-së në Këshillin Bashkiak të Tiranës. Meta tha pak ditë më parë në Korçë se gara është serioze, por janë fare të paktë (ose më mirë mungojnë) ata që besojnë se dikush mund të fitojë përballë Ilir Metës në një garë brenda LSI-së.
