Sindikata e Futbollistëve Profesionistë Shqiptarë (SFPSH) në dijeni të nisjes së bisedimeve mes përfaqësuesve të FSHF-së dhe Ministrisë së Shëndetësisë për rifillimin e sezonit futbollistik, kërkon të përfshihet në këtë bashkëpunim.
Kryetari i kësaj sindikate, Andi Lila, i ka dërguar një letër ministres Manastirliu, nëpërmjet së cilës i kërkon të bëhet faktor edhe institucioni që ai drejton prej disa kohësh, si mbrojtës i interesave të futbollistëve, të atyre që do të zbresin në fushë dhe duhet të zbatojnë protokollin që do të hartohet nga palët.
Lila shkruan ndër të tjera në letrën dërguar Manastirliut, që futbollistët do të përfaqësohen edhe me mjekë në konsultat me qëllim që futbolli të kthehet e të luhet në kushtet më të mira dhe të sigurta.
“E nderuar z/znj Ministre. Sapo jemi vënë në dijeni nga mediat për nisjen e bisedimeve ndërmejt Ministrisë së Shëndetësisë dhe FSHF-së për të përcaktuar protokollin mjekësor që do të vihet në zbatim dhe duhet të ndjekin ekipet për stërvitjet dhe ndeshjet zyrtare në kampionatin shqiptar të futbollit.
Kërkojmë nga ana juaj që pjesë e këtyre takimeve të bëhet edhe Sindikata e Futbollistëve Profesionistë Shqiptarë, e cila është mbrojtësja e vetme e interesave të futbollistëve shqiptarë, të cilët janë edhe aktorët kryesorë që do t’i nënshtrohen këtyre masave.
Për të dhënë kontributin tonë maksimal në këtë situatë, me qëllim që futbolli të rikthehet të luhet në kushte sa më të mira sigurie dhe për të mos u bërë vatër e përhapjes së virusit COVID-19, Sindikata do të përfaqësohet në këto takime edhe me mjekë”, lexohet në letrën dërguar ministres Manastirliu.
