Libri autobiografik i Chiellini-t, “Io, Giorgio” ka shkaktuar polemika të shumta. Giorgio Chiellini cilësoi Felipe Melon dhe Mario Balotelli si dy nga futbollistët më të këqinj që ka hasur në karrierën e tij, madje brazilianin e vendosi në krye të listës.
Felipe Melo nuk ka humbur aspak kohë dhe i është kundërpërgjigjur deklaratave të italianit. Duke folur për “La Gazzetta dello Sport”, braziliani e ka cilësuar kapitenin e Juventusit si një frikacak dhe si një humbës të rëndomtë.
“Ai nuk ka fituar asgjë në rangun ndërkombëtar. Ndoshta nuk i kanë mjaftuar shuplakat në Stamboll dhe në Kupën e Konfederatave. Para së gjithash, do të ishte interesante të njihnim episodet të cilave u referohet. Në çdo rast, për mua nuk ka asnjë problem t’i përgjigjem këtij mbrojtësi”.
“Kur isha në Torino, kurrë nuk kam shpërfillur askënd: shokët e skuadrës, drejtuesit dhe Juventusin në përgjithësi. Në këtë pikë, megjithatë, unë nuk kam asgjë me të. Dhe nuk do të kem kurrë. Ky mbrojtës hiqet si fenomen, por vuan sukseset e të tjerëve dhe gjithnjë e bën në brekë nga frika”.
“Është shumë e thjeshtë të flasësh keq për të tjerët në librin tënd. Ndoshta ky mbrojtës është akoma i zemëruar me mua, sepse kur shkova te Galatasaray i morëm me shpulla dhe i eliminuam nga Champions League. Ose sepse Interi ka fituar gjithçka dhe unë ndihem interist”.
“Më kujtohet edhe diçka tjetër. Mposhtëm 3-0 Italinë në Kupën e Konfederatave në vitin 2009, kompeticion që u fitua nga Brazili. Ndoshta vuan edhe për këtë. Po e mbyll duke thënë që ka treguar se nuk është profesionist me fjalët që ka thënë. Kjo quhet mungesë respekti, por po ndalem këtu dhe nuk dua të shtoj asgjë tjetër, gjëra të tilla duhet të mbeten në dhomat e zhveshjes”, deklaron Felipe Melo, lojtari i Palmeiras.
