Kreu i Partisë Demokratike Lulzim Basha, ka reaguar për dhunën policore të policisë ndaj protestuesve sot në Tiranë.
Në një reagim në mediat sociale, Basha shkruan se është përdorur dhunë barbare dhe është përgjegjësi direkte e Ramës.
Më tej ai, shton se qeveria po përdor edhe pandemisë për grabitjen e Teatrit Kombëtar dhe po përdor dhunë fashiste ndaj qyetarëve.
“Pasi i vjedh përditë dhe i gënjen me premtime boshe, Rama përdor dhunë fashiste kundër qytetarëve edhe sot në Ditën e Europës. Kjo dhunë barbare është përgjegjësi direkte e Ramës. Babëzia për të zhvatur TK është vepra e tij. Ky regjim po përdor edhe pandeminë për grabitjen e Teatrit Kombëtar dhe projektin e pastrimit të parave të krimit. Kalimi i TK në pronësi të kryebetonierit të mafias dhe dhuna fashiste ndaj protestuesve paqësorë është akt lufte i Ramës ndaj artit dhe qytetarëve shqiptarë”, shkruan Basha.
Këtë të shtunë, dhjetëra qytetarë u dhunuan dhe u shoqëruan me forcë nga policia pasi dolën në protestë në mbrojtje të Teatrit Kombëtar, që një ditë më parë, me vendim qeverie, i kaloi në pronësi të Bashkisë së Tiranës. Kreu i bashkisë Erion Veliaj është zotuar publikisht se do të shembë godinën e teatrit.
