Kapiteni i Juventusit, Giorgio Chiellini, së shpejti do të nxjerrë në shitje librin e tij autobiografik “Io, Giorgio”. Të gjithë fitimet nga shitja e këtij libri do të shkojnë për bamirësi.
Duke folur për gazetën “La Repubblica”, mbrojtësi veteran ka zbuluar disa kapituj të librit, ndërsa ka përshkruar pa doreza emra të njohur të futbollit. Chiellini nuk është rezervuar aspak ndaj sulmuesit italian Mario Balotelli, të cilin e ka cilësuar një njeri negativ, që nuk mendon aspak për grupin, ndërsa as ndaj Felipe Melos nuk i ka kursyer fjalët.
“Mario Balotelli është një njeri negativ, pa respekt për grupin. Në një ndeshje të Kupës së Konfederatave në 2013-ën, nuk na ndihmonte për asgjë. Felipe Melo ishte më i keqi i të këqijve. Me të rrezikohej gjithmonë lufta. Ua kam thënë edhe drejtuesve, është një dele e zezë”, ka shkruar Chiellini në biografinë e tij.
“Nuk e kam mllef dhe as nuk më intereson të kem. Unë nuk jam miku më i mirë i kujtdo, por këta të dy i kanë kaluar limitet e pranueshme të sjelljes. Për mënyrën si i shikoj unë gjërat, problemi nuk është nëse luan mirë apo luan keq, por nuk e pranoj kur mungon respekti ndaj grupit”, – tha futbollisti.
