Me lehtësimin e masave në Shqipëri më 23 qershor, do të mundësohet edhe organizimi i dasmave, por gjithnjë duke respektuar masat dhe rregullat e mbrojtjes nga koronavirusi.
Lajmin e ka dhënë Ermal Mamaqi mbrëmjen e djeshme pas një takimi me ministrin Blendi Klosi:
“Mbas nje takimi sot me Ministrin e Turizmit Blendi Klosi, si përfaqësues të një industrie shumë të fuqishme për ekonominë Shqiptare (rreth 200Mln Euro/Vit) morem një lajm të mrekullueshem për të gjithë ata që kanë dasmën në 2020. Në dt. 23 Qershor me lirimin e masave do mundësohet dhe realizimi i ceremonive martesore sipas një protokolli të aprovuar nga organet përkatëse”, ka shkruar Ermali.
Ky lajm është vlerësuar nga këngëtari Labinot Tahiri i cili prej ditësh ka paralajmëruar protesta në Kosovë, për lejimin e dasmave dhe ahengjeve, si e vetmja mënyrë e fitimit për disa këngëtarë në vend. Madje ai ka pasur edhe një debat me këngëtaren Leonora jakupi, e cila tha se shëndeti është më i rëndësishëm në këtë periudhë.
Tahiri shpreson që edhe në Kosovë të ndodhë e njëjta gjë, duke i respektuar masat që do t’i vendosë ministria.
“Hajde bre dhashtë Zoti që edhe në Kosovë të ndodhë e njëjta gjë nga Ministri i nderuar Vitia dhe Kryeministri Kurti, që të lejohet sezona normal me masat të cilat i paraqet ministria! Vlerë të madhe humb edhe buxheti i shtetit nëse dështon sezona për hoteleri, butika, frizer sallone e shumë të tjera nga gastronomia. Shëndetin e paqim gjithmonë e mos po behet mirë Me respekt, Labinot Tahiri Ferizaj Kosovê e Shqipërisë” – shkruan Labi.
